Թութք. armeniamedicalcenter.am

Հեմորոիդալ հանգույցներն առկա են յուրաքանչյուրի օրգանիզմում: Դրանք կավերնոզ երակները, շարակցական հյուսվածքը և մկանային թելիկները ծածկող անալ խողովակի լորձաթաղանթի ծալքեր են: Նրանք, բացի մկանային սեղմիչի /սֆինկտրի/ լրացուցիչ մաս լինելուց, նաև պահում են կղանքային մասսաները:

Հանգիստ վիճակում հեմորոիդալ հանգույցները մասնակցում են անալ խողովակը ծածկելուն, իսկ դեֆեկացիայի ժամանակ այդ բրգիկները պետք է հարթվեն այնպես, որ չխանգարեն կղանքի դուրս գալուն: Հեմորոիդալ հանգույցներն անալ խողովակի պատերին ամրացված են շարակցական և մկանային թելիկներով: Եթե դա խանգարվում է ուժեղ նքոցների հետևանքով, հանգույցները լորձաթաղանթի հետ իջնում են ներքև:  Դրան հետևում է արյան շրջանառության փոփոխություն և խանգարում, որը բերում է հեմորոիդալ հանգույցների մեծացմանը և դեպի դուրս փքվելուն:

Հիվանդության փուլերը

• հեմորոիդալ հանգույցների մեծացում՝ արյունահոսությամբ ուղեկցվող,
• հեմորոիդալ հանգույցները դեֆեկացիայի ժամանակ դուրս են գալիս, բայց ինքնուրույն վերականգնվում են,
• հեմորոիդալ հանգույցները դեֆեկացիայի ժամանակ դուրս են գալիս և ուղղվում միայն ձեռքի օգնությամբ,
• հեմորոիդալ հանգույցները դեֆեկացիայի ժամանակ դուրս են գալիս և չեն ուղղվում` հեմորոիդալ հանգույցների սուր թրոմբոզ, հանգույցները չեն ուղղվում, առկա է սուր ցավ:

Ցանկացած փուլում հնարավոր է արյունահոսություն:

Հիվանդության ախտանշանները.

• դեֆեկացիայի ժամանակ` արյան առկայություն,
• քոր, թացություն և արտադրություններ` հետանցքում,
• հեմորոիդալ հանգույցների արտանկում,

Նպաստող գործոնները.

• դեֆեկացիայի ժամանակ` հաճախակի և երկարատև նքոցներ,
• ներորովայնային ճնշման բարձրացում,
• կղանքի պինդ մասսաներ,
• լուծ:

Այս ամենից զատ, որոշակի դեր ունի նաև ժառանգական նախատրամադրվածությունը:

Հարցեր, պատասխաններ, մեկնաբանություններ